“МЕТАЛ БОЛОВСРУУЛАХ ТЕХНОЛОГИ” ХӨТӨЛБӨР
МАШИН ҮЙЛДВЭРЛЭЛИЙН ТЕХНОЛОГИ
БАКАЛАВР: Өдөр 4 жил
МАГИСТР: 1,5-2 жил
МЭРГЭЖЛИЙГ ЭЗЭМШСЭНЭЭР:
• Металл боловсруулах, машин үйлдвэрлэл болон засвар
механикийн бүх газруудад инженер
• Эд анги, тоног төхөөрөмжийг зохион бүтээх, зураг төсөл
боловсруулах зохион бүтээгч
• Засвар үйлчилгээ хийх, эд ангийн боловсруулалтын ба угсралтын
технологи боловсруулах технологич инженер
• Үйлдвэрийн процессыг хянан удирдах инженер
• Их дээд сургууль, эрдэм шинжилгээний байгууллагад багш,
судлаач
• Бүтээгдэхүүний чанарыг сайжруулах талаар төсөл боловсруулах,
хэрэгжүүлэх, ажилчдыг мэргэжлийн удирдлагаар хангах, удирдан
зохион байгуулах инженер зэрэг чиглэлээр ажиллах боломжтой.
Суралцагч оюутнууд инженерийн суурь болон мэргэшүүлэх хичээлүүдийг үзэж металлын ангилал, бүтэц, шинж чанар, туршилт, тооцооны үндэс, стандартчиллын тухай үндсэн ойлголт, металл боловсруулах технологийн үндэс, эд анги үйлдвэрлэх технологийн процесс, зоролтын онол, металл зорох багаж, хэрэгсэл, суурь машины ажиллах зарчим, механик боловсруулалтын нарийвчлал, түүнд нөлөөлөх хүчин зүйлс, боловсруулалтын дараах гадаргууны чанар, машин ба эд ангийн ашиглалтын нөхцөл, ажиллах чадвар, найдварт ажиллагааны онол, элэгдлийн онолын үндэс, сэргээн засварлах арга, тоон удирдлагатай машинаар металл боловсруулах, CAD, CAM, CAE систем, загварчлал (симуляци) хийх, салбарын бизнес, менежмент, удирдлага, зохион байгуулалтын үндсийг судлах болно.
Эзэмших ур чадвар:
- Бүх төрлийн машины эд ангийн ажлын зургийг стандарт баримт бичгийн дагуу үйлдэх,
- Тоон системийн удирдлагагай машин дээр боловсруулалт хийх
- Тоног төхөөрөмж, суурь машин, зорох болон хэмжих багаж хэрэгсэл зохион бүтээх,
- Хэмжих арга, хэрэгслээ зөв сонгон хэрэглэх
- Сэргээн засварлах үндэслэлийг зөв тодорхойлж, тохирох арга, технологийг сонгож ашиглах
- Металл боловсруулалтаар загварчлал (симуляци) хийх
- Орчин үеийн мэдээллийн технологийг ашиглан өгөгдөл, үр дүн боловсруулах, шинэ мэдлэг олж авах, бүтээлчээр тасралтгүй бие даан суралцах,
- Үйлдвэрлэлийн үйл ажиллагааг удирдах онол, практикийн ур чадвар эзэмших,
- Бизнесийн харилцааны болон хувь хүний манлайлах, багаар ажиллах, бусдын үзэл бодлыг хүндэтгэн зөвшилцөж шийдвэр гаргах, хариуцлага хүлээх.
Ажлын байр:
Монгол Улсад 1.5 сая тонн түүхий тос боловсруулах хүчин чадалтай “Газрын тос боловсруулах үйлдвэр”-ийн төсөл 2021 оны IV улиралд хэрэгжиж дуусна. Бүтээн байгуулалтын хугацаанд нийт 1 тэрбум гаруй ам.долларын хөрөнгө оруулалт хийгдэж, валютын орох урсгал нэмэгдсэнээр макро эдийн засгийн тэнцвэрийг хангана. Үйлдвэрийг дагаж 30 төрлийн дагалдах үйлдвэрүүд байгуулагдаж аж үйлдвэрийн салбарын нийт үйлдвэрлэл 30 орчим хувиар нэмэгдэнэ. Энэ нь машин үйлдвэрлэлийн технологи мэргэжлийн эрэлт, хэрэгцээг нэмэгдүүлэх болно.