ШУТИС-ийн Дархан-Уул аймаг дахь Технологийн сургууль үүсэн байгуулагдсаны 25 жилийн ойн арга хэмжээний хүрээнд оюутан залуусыг идэвхжүүлэх зорилгоор 2016 оны 3-6 дугаар сарыг дуустал хугацаанд 7 хоног бүр “Пүрэв гарагийн зочин байгууллага” нэртэй үйл ажиллагаа зохион байгуулж байна. Анхны зочин байгууллагаар хошууч Г.Ганбаатар захирагчтай Зэвсэгт хүчний 330 дугаар ангийн II Мотобуудлагын ротын бие бүрэлдэхүүн 2016 оны 03 дугаар сарын 10-ны өдөр ажиллаж, оюутан сурагчдад үйл ажиллагаагаа танилцуулан байлдааны зэвсэг хэрэгсэл, энхийг дэмжих ажиллагааны зурагт танилцуулга зэргээр үзэсгэлэн зохион байгууллаа. Тус үйл ажиллагааны үеэр нормативын тэмцээн /Галын бэлтгэл/, нормативын тэмцээн /ҮОХЗБ хими/, цэргийн цол нэрлэх, цэргийн холбогдолтой дууны ая таалгах гэсэн 4 төрлийн тэмцээн явагдаж тэргүүн байр эзэлсэн оюутнуудыг өргөмжлөл, 330 дугаар ангийн дурсгалын зүйлээр шагнаж урамшууллаа.

Шагналыг зэвсэгт хүчний 330 дугаар ангийн Иргэн-цэргийн харилцааны ажилтан ахмад Б.Батням гардуулан өглөө. Дашрамд тэмдэглэхэд оюутнуудын гол сонирхож байсан асуулт бол “Оюутан цэрэг” хөтөлбөр байв.Энэхүү үйл ажиллагаа нь Зэвсэгт хүчний 95 жилийн ой, Монгол цэргийн өдөртэй давхцаж байгаагаараа онцлогтой болсон юм.

Бидний урилгыг хүлээн авч “Пүрэв гарагийн зочин байгууллага”-р оролцон сонирхолтой арга хэмжээ зохион байгуулсан Зэвсэгт хүчний 330 дугаар ангийн бие бүрэлдэхүүнд талархасанаа илэрхийлж ажлын амжилт хүсье.

2016 оны 03 дугаар сарын 17-ны “Пүрэв гарагийн зочин байгууллага”-р Дархан-Уул аймгийн Нийгмийн даатгалын хэлтэс ажиллах тул оюутан залуус та бүхэн идэвхтэй оролцоно уу.

Сургуулийн захиргаа, Оюутны зөвлөл