Оюутны байранд амьдардаг оюутнууддаа дархлаа дэмжих багц, хүнсний бүтээгдэхүүн тараалаа

Монгол Улсын Засгийн газрын 2020 оны 11 дүгээр сарын 11-ний өдрийн “Бүх нийтийн бэлэн байдлын зэрэгт шилжүүлэх тухай” 178 тогтоол гарсантай холбогдуулан их, дээд сургууль, коллежийн захирал нарт Боловсрол, шинжлэх ухааны яамнаас оюутны байранд амьдарч байгаа оюутнуудыг аль болох байрнаас гаргахгүйгээр хоол хүнсээ аюулгүй нөхцөл байдалд авах боломжийг бүрдүүлж, хоол хүнсээр дэмжих чиглэл өгсний дагуу ШУТИС-ийн захирлын зөвлөлийн 2020 оны 11 дүгээр сарын 13-ны өдрийн шуурхай хуралдааны шийдвэрээр оюутны байранд амьдарч буй оюутнуудад дэмжлэг үзүүлэх зорилгоор эмнэлгийн хэрэгсэл, дархлаа дэмжих хүнсний бүтээгдэхүүн олгохоор шийдвэрлэв. Энэ шийдвэрийг ШУТИС-ийн Дархан-Уул аймаг дахь Технологийн сургууль оюутны байранд амьдарч буй нийт 141 оюутанд дархлаа дэмжих багц, хүнсний бүтээгдэхүүний багц тарааж оюутнууддаа сэтгэлийн дэм үзүүллээ. Багц бүтээгдэхүүнд “Улаанбаатар гурил” үйлдвэрийн 1-р гурил 5 кг, цагаан будаа 5 кг, “Дархан хүнс“ үйлдвэрийн боорцог 5 кг, боодол сармис, амны маск 20 ширхэг, С витамин 4 боодол, зөв аарцны ундаа 4 ширхэг гэх мэт зүйлс багтжээ.

Корона буюу цар тахлын хоёр дахь давалгаа нөлөөлж дотооддоо цар тахлын халдвар алдсан нөхцөл байдал үүсч байгаа тул хүн бүр илүү хариуцлагатай, сонор сэрэмжтэй байж, мэргэжлийн байгууллагаас өгч буй зөвлөмжийн дагуу халдвар хамгаалалтын дэглэмийг чанд мөрдөн энэ аюулт өвчнийг даван туулахыг оюутнууддаа уриалж байна.

СУРГУУЛИЙН ЗАХИРГАА

АЖ АХУЙН АЛБА