Дархан-Уул аймгийн засаг дарга С.Насанбатын урилгаар 12 дугаар анги төгсөгчдөд хүндэтгэл үзүүлэх “ШИНЭ ӨГЛӨӨ” арга хэмжээний хөтөлбөрийн дагуу Шарын гол, Орхон, Хонгор, Салхит сумдуудын нийт 119 төгсөгч, захирал, багш нар ирж Шинжлэх Ухаан Технологийн Их Сургуулийн Дархан-Уул аймаг дахь Технологийн сургуулийн үйл ажиллагаатай танилцлаа.

Тус үйл ажиллагаанд Дархан-Уул аймгийн Боловсрол, Соёлын газрын дарга н.Ганчулуун, оюутны холбооны дарга Д.Амгалан, нарийн бичгийн дарга Э.Билгүүн, Шарын голын сургуулийн захирал н.Батбаяр, Салхит сумын сургуулийн захирал н.Чулуунцэцэг, Хонгор сумын сургуулийн захирал Төгсжавхлант, Орхон сумын сургуулийн захирал н.Нарангэрэл нар 12 дугаар ангийн төгсөгчидтэйгээ хамт зочилж мэргэжлээ сонгоход нь зөвлөгөө өгч байв.

Үйл ажиллагааны үеэр захирал Ц.Батбаатар 12 дугаар анги төгсөгчдийг хурлын зааланд хүлээн авч сургуулийнхаа тухай танилцуулж мэргэжлийн хөтөлбөрийн талаар танилцуулж, зөв сонголт хийхэд нь зөвлөгөө өглөө. Дэд захирал Я.Батцэцэг тус сургуульд хэрхэн элсэх, элсэлтийн ямар шаардлагуудыг хангасан, юуг анхаарах ёстойг танилцуулав. Мөн тус сургуулийн лаборториудтай танилцан зарим нэг сонирхолтой туршилтуудыг хийсэн нь сурагчдын сэтгэлийг ихээхэн хөдөлгөв. (Галт уулын дэлбэрэлт, Метал судлалын виртуаль лаборатори, Барилгын материал технологийн лаборатори, хүчний электроникийн лабораторийн робот хийж буй туршилт гэх мэт)